ដោយ ជិន ជេដ្ឋា RFA 2016-05-20
អ្នកបកប្រែ អ្នកបើកគ្រឿងចក្រ និងកម្មករដាំដំឡូងមីឲ្យក្រុមហ៊ុនចិន មួយនៅខេត្តពោធិ៍សាត់ ឈ្មោះ ឌាន ដា បាយអូ អេនើជី អ៊ិនវេសមិន គ្រុប (Dean Da Bio-energy Investment Group) បានរំសាយគម្រោងធ្វើបាតុកម្មបិទផ្លូវជាតិលេខ៥ នៅព្រឹកថ្ងៃទី២០ ខែឧសភា។ ការប្រកាសរំសាយនេះ បន្ទាប់ពីភាគីក្រុមហ៊ុនយល់ព្រមបើកប្រាក់ឈ្នួលឲ្យពួកគេជាបន្តបន្ទាប់ចាប់តាំងពីថ្ងៃទី១៨ ខែឧសភា មក។
តំណាងកម្មករម្នាក់ដែលថ្លែងក្នុងលក្ខខណ្ឌសុំមិនបញ្ចេញឈ្មោះឲ្យដឹងថា អ្នកបម្រើការងារឲ្យក្រុមហ៊ុនស្ទើរគ្រប់ផ្នែកប្រមាណ ២០០នាក់ ដែលធ្លាប់ស្រុះស្រួលគ្នានោះបានអល់អែកក្នុងការធ្វើបាតុកម្មតាមគម្រោងរបស់ខ្លួនទៅវិញ ដោយយល់ថា ក្រុមហ៊ុននឹងបើកប្រាក់ឈ្នួលដល់កម្មករទាំងអស់គ្នា៖ «គម្រោងហ្នឹងត្រូវបានរំសាយ ដោយសារគេបើកនៅថ្ងៃទី២០។ ការពិតគេបើកតាំងពីថ្ងៃទី១៩ ណោះ។ យើងបាតុកម្មដើម្បីទាមទារប្រាក់ខែ ឬកម្លាំងពលកម្មរបស់យើង អ៊ីចឹងដល់ពេលគេបើកឲ្យហើយ យើងទាមទារទៀត គឺខុសយើង អ៊ីចឹងទៅទាក់ទងគ្នាទាំងអស់គ្នាហ្នឹងឲ្យសម្រាកសិនទៅ។ បើឲ្យស្ងប់ចិត្តដូចមិនទាន់ស្ងប់ទេ ព្រោះនៅតែមិនទុកចិត្តក្រុមហ៊ុនហ្នឹង បោកច្រើនដងពេក»។
ក្រុមហ៊ុនចិន ដែលទទួលបានដីវិនិយោគបន្តពីក្រុមហ៊ុនភាពីម៉ិច (Pheapimex) នៅស្រុកក្រគរ ខេត្តពោធិ៍សាត់ មានការដ្ឋានដាំដំឡូងចំនួន ២៨ការដ្ឋាន ហើយមានកម្មករដាំដំឡូងរាប់ពាន់នាក់។ ក្រុមអ្នកតវ៉ាចោទក្រុមហ៊ុនថា បានបោកប្រាស់កម្មករដោយសន្យាបើកប្រាក់ឈ្នួលថ្ងៃនេះ ឬថ្ងៃនោះរហូតចាប់តាំងពីចុងឆ្នាំ២០១៥ មក ហើយពួកគេធ្លាប់តវ៉ាប្រឆាំងនឹងក្រុមហ៊ុនចំនួនបួនលើករួចមកហើយ៕