VAYO, ដោយ៖ លាង ធីតា 21-05-2016
“ការលើកឡើងរបស់លោក សួន សេរីរដ្ឋាហាក់ដូចជាខ្វះខាតការស្វែងរកព័ត៌មាន ខ្វះការយល់ដឹងពីច្បាប់ និងខ្វះខាតការយល់ដឹងពីរចនាសម្ព័ន្ធនយោបាយវិស័យកងទ័ព”។ នេះជាលើកឡើងរបស់លោកផៃស៊ីផាន អ្នកនាំពាក្យទីស្ដីការគណៈរដ្ឋមន្ត្រី បន្ទាប់ពីលោកសួន សេរីរដ្ឋាប្រធានគណបក្សអំណាចខ្មែរនិយាយរិះគន់ ពាក់ព័ន្ធនឹងគណបក្សប្រជាជនកម្ពុជា ប្រើសិទ្ធិនយោបាយរបស់ខ្លួន ដើម្បីរៀបចំរចនាសម្ព័ន្ធសាខាគណបក្សនៅក្នុងជួរកងទ័ព។ លោកសួន សេរីរដ្ឋាថែមទាំងព្រមានទៅគណបក្សប្រជាជនកម្ពុជាថា កុំឱ្យមានបញ្ហារើសអើងនយោបាយ ក្នុងជួរកងទ័ពកើតមានឱ្យសោះ ពីព្រោះកងទ័ពមិនមែនកាន់ប៊ិចសរសេរទេ។
ជាការឆ្លើយតប លោកផៃស៊ីផានបញ្ជាក់ថា ការលើកឡើងបែបនេះ ជាការគិតខុស ការមិនយល់ ឬគិតនៅក្នុងភាពមិនសុចរិតប៉ុណ្ណោះ។ នៅក្នុងរដ្ឋធម្មនុញ្ញកម្ពុជា បានចែងយ៉ាងច្បាស់ថា នាយករដ្ឋមន្ត្រីជាមេបញ្ជាការ ដើម្បីការពារវិស័យសាធារណៈ វិស័យការពារជាតិ និងការពារនិត្យានុកូភាព។ ដូច្នេះ មិនមានកំហុសឆ្គងឡើយ ដោយយោធាស្ថិតនៅក្រោមបញ្ជារបស់នាយករដ្ឋមន្ត្រី។ ប៉ុន្តែ ក្នុងជួរយោធា មិនមានការបំរើគណបក្សនយោបាយណាមួយឡើយ...
គួរបញ្ជាក់ថា សម្ដេចហ៊ុន សែនធ្លាប់បានប្រកាសហើយថា កងប្រដាប់អាវុធត្រូវមានកាតព្វកិច្ចចែងនៅក្នុងមាត្រា៥២ ក្នុងរដ្ឋធម្មនុញ្ញនៃព្រះរាជាណាចក្រកម្ពុជា។ ក្នុងមាត្រានោះ បញ្ជាក់ថា នាយករដ្ឋមន្ត្រីជាមេបញ្ជាការផ្ទាល់ នៅក្នុងជួរកងទ័ព៕