ភ្នំពេញ ប៉ុស្តិ៍ មាស សុខជា Tue, 24 May 2016
ភ្នំពេញៈ មូលនិធិ កូហ្វីអាណាន់ មិនបានពិភាក្សាអំពីសមាជិករបស់ គ.ជ.ប និងមន្រ្តី គ.ជ.ប ដែលកំពុងជាប់ពាក់ព័ន្ធក្នុងរឿងក្តីដ៏ចម្រូងចម្រាសនៅតុលាការទេបើទោះបីជាប្រធានស្ថាប័ននេះបានលើកឡើងពីបញ្ហានេះហើយគណបក្សប្រឆាំងបានស្នើឲ្យមូលនិធិជួយអន្តរាគមន៍ឲ្យមានការដោះលែងមន្ត្រី គជប ដែលកំពុងជាប់ឃុំក៏ដោយ។
លោក ហង្ស ពុទ្ធា អ្នកនាំពាក្យ គ.ជ.ប បានថ្លែងថាលោក ស៊ិក ប៊ុនហុក ប្រធាន គ.ជ.ប បានជួបប្រជុំជាមួយនឹងគណៈប្រតិភូនៃមូលនិធិ កូហ្វីអាណាន់ ដឹកនាំដោយលោក Alan Doss កាលពីម្សិលមិញអំពីកិច្ចសហប្រតិបតិ្តការរវាងមូលនិធិ និង គ.ជ.ប ក្នុងកំណែទម្រង់ការបោះឆ្នោតនៅកម្ពុជាហើយលោកប្រធាន គ.ជ.ប បានលើកឡើងបន្តិចពីលោក នី ចរិយា អគ្គលេខាធិការរង គ.ជ.ប ដែលកំពុងជាប់ឃុំប៉ុន្តែកិច្ចប្រជុំមិនបានពិភាក្សាពីរឿងក្តីនេះទេ។
លោក ពុទ្ធា បានបញ្ជាក់ប្រាប់អ្នកសារព័ត៌មានបន្ទាប់ពីកិច្ចប្រជុំថា៖ «គ.ជ.ប ជាស្ថាប័នអព្យាក្រឹតដូច្នេះ គ.ជ.ប មិនជ្រៀតជ្រែកក្នុងសមត្ថកិច្ចរបស់ស្ថាប័នផ្សេងទៀតទេ។ បន្ទាប់ពី [គណៈប្រតិភូ] ជួបប្រជុំជាមួយនឹងអង្គការក្រៅរដ្ឋាភិបាលប្រហែលយើងមានការពិភាក្សាអំពីរឿងក្តីនេះ [ករណីលោក នី ចរិយា]»។
លោក ពុទ្ធា បានបញ្ជាក់ផងដែរថា គ.ជ.ប ទទួលបានការអនុញ្ញាតពីតុលាការរួចហើយដើម្បីទៅជួបសួរសុខទុក្ខលោក នី ចរិយា ហើយ គ.ជ.ប នឹងជ្រើសរើសសមាជិក ៣ រូប និងអ្នកជំនាញច្បាប់ ៤ រូបទៅជួបគាត់ក្នុងពេលឆាប់ៗ។ «បច្ចុប្បន្ននេះ គ.ជ.ប ជា គ.ជ.ប កែទម្រង់ដូច្នេះបើទោះបីជាបាត់បង់សមាជិក ឬមន្រ្តីមួយចំនួនក៏ដោយ ក៏ គ.ជ.ប នៅតែទទួលខុសត្រូវរៀបចំការបោះឆ្នោតដោយសង្ឃឹមថាលទ្ធផលអាចទទួលយកបានដោយអ្នកចូលរួម»។
ទាក់ទងនឹងការឃុំខ្លួនលោក នី ចរិយា លោក Alan Doss នាយកប្រតិបតិ្តនៃមូលនិធិ កូហ្វីអាណាន់ មិនបានធ្វើអត្ថាធិប្បាយទេដោយលើកឡើងថាលោកទើបតែបានមកដល់ប្រទេសកម្ពុជាដូច្នេះលោកមិនស៊ីជម្រៅពីករណីនេះទេ។
លោក Alan Doss បានប្រាប់អ្នកសារព័ត៌មានថាមូលនិធិគឺជាស្ថាប័នមិនលម្អៀង និងឯករាជ្យបង្កើតឡើងដោយអតីតអគ្គលេខាធិការអង្គការសហប្រជាជាតិហើយមូលនិធិធ្វើការជាមួយនឹងបណ្តាប្រទេស និងអង្គការជុំវិញពិភពលោកដើម្បីជួយពង្រឹងទំនុកចិត្តលើការបោះឆ្នោតដែលជាមូលដ្ឋានគ្រឹះនៃអភិបាលកិច្ចតាមលទ្ធិប្រជាធិបតេយ្យ។
លោកលើកឡើងថា៖ «យើងគិតថាជាការសំខាន់ក្នុងការឆ្លើយតប គ.ជ.ប ហើយគ្រាន់តែផ្លាស់ប្តូរចាប់ផ្តើមសន្ទនាជាមួយ [គ.ជ.ប]។ ខ្ញុំត្រូវបានលើកទឹកចិត្តឱ្យមកទីនេះខ្ញុំរីករាយដែលបានវិលត្រឡប់មកកម្ពុជាវិញហើយខ្ញុំចង់ឃើញប្រទេសនេះទទួលបានជោគជ័យ»។
លោក សំ គុន្ធាមី នាយកប្រតិបត្តិអង្គការ NIFEC បាននិយាយថាខណៈដែលលោកបានតាមដានកិច្ចប្រជុំរវាង គ.ជ.ប និងមូលនិធិ កូហ្វីអាណាន់ គ.ជ.ប គួរនិយាយអំពីករណីរបស់លោក រ៉ុង ឈុន នៅតុលាការ និងការចាប់ខ្លួនលោក នី ចរិយា ជាមួយនឹងមូលនិធិ កូហ្វីអាណាន់។
លោកបន្តថា៖ «តាមពិត គ.ជ.ប គួរលើកឡើងអំពីករណីនេះផងដែរ ដែលពាក់ព័ន្ធនឹងការងាររបស់ខ្លួន។ ខ្ញុំមានការងឿងឆ្ងល់ក្នុងករណីនេះ។ ខ្ញុំនឹងជួប [មូលនិធិ កូហ្វីអាណន់] នៅថ្ងៃស្អែក [ថ្ងៃនេះ] ខ្ញុំនឹងលើកឡើងពី [ករណីលោក នី ចរិយា]»។
កាលពីម្សិលមិញនេះដែរគណៈប្រតិភូរបស់មូលនិធិក៏បានជួបប្រជុំជាមួយសមាជិកសភាគណបក្សសង្គ្រោះជាតិដែលដឹកនាំដោយលោក កឹម សុខា ប្រធានស្តីទីនៅទីស្នាក់ការរបស់គណបក្សហើយបានលើកឡើងពីការពង្រឹង គ.ជ.ប ដើម្បីឱ្យមានតម្លាភាព និងទំនុកចិត្តពីអ្នកបោះឆ្នោត និងគណបក្សនយោបាយថែមទាំងបានលើកឡើងថាការចាប់ឃុំខ្លួនអគ្គលេខាធិការរងរបស់ គ.ជ.ប ធ្វើឲ្យប៉ះពាល់ដល់បរិយាកាសនយោបាយ និងកិច្ចការរៀបចំការបោះឆ្នោតរបស់ គ.ជ.ប។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិថ្លែងប្រាប់អ្នកសារព័ត៌មានបន្ទាប់ពីកិច្ចប្រជុំថា៖ «[គណបក្សសង្គ្រោះជាតិ] បានស្នើសុំតំណាងមូលនិធិ កូហ្វីអាណាន់ ជួយដោះស្រាយបញ្ហានៃការចោទប្រកាន់មកលើលោកអគ្គលេខាធិការរង គ.ជ.ប [លោក នីចរិយា]»។ លោកបានបន្ថែមថាជាការឆ្លើយតបមូលនិធិបានឲ្យដឹងថាមូលនិធិនឹងប្រមូលព័ត៌មានឲ្យបានគ្រប់ជ្រុងជ្រោយជាមុនសិនដើម្បីសម្រេចឆ្លើយតបនឹងគណបក្សសង្គ្រោះជាតិ។
ការមកបំពេញទស្សនកិច្ចនៅកម្ពុជារបស់គណប្រតិភូមូលនិធិកូហ្វីអាណាន់នៅពេលនេះស្របពេលដែលស្ថានការណ៍នយោបាយនៅកម្ពុជាត្រូវបានគេមើលឃើញថាកំពុងឡើងកម្តៅ។ ឡើងកម្តៅដោយសារតែថ្មីៗនេះមន្ត្រីសិទ្ធិមនុស្ស ៤ រូប និងមន្ត្រី គជប ១ រូបត្រូវបានចាប់ឃុំខ្លួនហើយតុលាការបានប្រកាសបន្តនីតិវិធីទៅលើសមាជិក គជប ម្នាក់ពីបក្សប្រឆាំងចំពោះរឿងក្តីដែលមជ្ឈដ្ឋានជាច្រើនចាត់ទុកថាមានជាប់ពាក់ព័ន្ធនឹងនយោបាយ៕ TK