ដោយ ជិន ជេដ្ឋា RFA 2016-05-28
សកម្មជនគណបក្សសង្គ្រោះជាតិ នៅតាមស្រុកមួយចំនួន នៃខេត្តកំពង់ឆ្នាំង ត្រូវអាជ្ញាធរហៅទៅធ្វើកិច្ចសន្យា និងព្រមានឲ្យបញ្ឈប់សកម្មភាពដើរប្រមូលស្នាមមេដៃពលរដ្ឋ ដើម្បីថ្វាយព្រះមហាក្សត្រឲ្យជួយអន្តរាគមន៍ដោះលែងមន្ត្រីសិទ្ធិមនុស្ស និងអ្នកនយោបាយ។ មន្ត្រីការពារសិទ្ធិមនុស្សថា ទង្វើរបស់អាជ្ញាធរនេះ គឺជាការគំរាមកំហែង និងរំលោភសិទ្ធិមនុស្ស។
អនុប្រធានគណៈកម្មាធិការប្រតិបត្តិ និងជាសមាជិកក្រុមប្រឹក្សាខេត្តកំពង់ឆ្នាំង កូតាពីគណបក្សសង្គ្រោះជាតិ ឲ្យដឹងនៅថ្ងៃទី២៧ ខែឧសភា ថា យ៉ាងហោចមានសកម្មជនរបស់ខ្លួនចំនួន ១៧នាក់ នៅស្រុកសាមគ្គីមានជ័យ កំពង់ត្រឡាច ទឹកផុស ជលគីរី និងស្រុកកំពង់លែង ត្រូវមេឃុំ និងនាយប៉ុស្តិ៍របស់ស្រុកទាំងនោះព្រមានមិនឲ្យដើរប្រមូលស្នាមមេដៃ ចាប់តាំងពីថ្ងៃទី១៨ ខែឧសភា រហូតមក។
មន្ត្រីគណបក្សប្រឆាំង លោក ដួង ចន្ដ្រា បញ្ជាក់ថា នៅទូទាំងខេត្តគ្រោងប្រមូលស្នាមមេដៃឲ្យបាន ៤ម៉ឺននាក់ ប៉ុន្តែដោយមានការរារាំងពីអាជ្ញាធរ សកម្មជនលោកទើបប្រមូលបានប្រមាណ ៣ម៉ឺននាក់ប៉ុណ្ណោះ។ លោកថា មន្ត្រីបក្សថ្នាក់ខេត្តនឹងសរុបស្នាមមេដៃបឋមនៅថ្ងៃទី៣១ ខែឧសភា ហើយអាចបន្តផ្ដិតបន្ថែមទៀតរហូតដល់ថ្ងៃដែលមន្ត្រីថ្នាក់ជាតិឲ្យហែញត្តិនេះទៅរាជធានីភ្នំពេញ៖ «ការរារាំងនេះឃើញថា ឃុំខ្លះធ្វើបានសម្រេចតាមផែនការ ហើយឃុំខ្លះទៀត រងការរារាំងខ្លាំង អ៊ីចឹងទៅប្រហែលមិនបានដល់ ៤ម៉ឺនស្នាមមេដៃទេ ប្រហែលបានជាង ៣ម៉ឺនប៉ុណ្ណោះ។ នៅក្នុងញត្តិនោះ គឺមិនពាក់ព័ន្ធនឹងរឿងនយោបាយអ្វីទាំងអស់ គឺចំណុចទី១ សូមឲ្យដោះលែងអ្នកនយោបាយ និងមន្ត្រីសង្គមស៊ីវិល ទី២ បញ្ឈប់ការប្រើប្រាស់ស្ថាប័នរដ្ឋ ដើម្បីគំរាមកំហែង និងដាក់សម្ពាធលើសង្គមស៊ីវិល និងគណបក្សប្រឆាំង ទី៣ បញ្ឈប់ការប្រើប្រាស់អំណាចរដ្ឋ ដោយមានស្តង់ដារពីរ និងទី៤ បញ្ឈប់ប្រើអំណាចតុលាការ រំលោភបំពានលើអំណាចនីតិប្បញ្ញត្តិ ជាពិសេសរំលោភលើអភ័យឯកសិទ្ធិសភា»។
ទាក់ទងបញ្ហានេះ អ្នកនាំពាក្យសាលាខេត្តកំពង់ឆ្នាំង លោក ម៉ម ឈឿម ថាលោកបានទទួលព័ត៌មាននេះ ប៉ុន្តែនេះគឺជាការងារខាងសមត្ថកិច្ចប៉ូលិស ដែលលោកយល់ថា ការដែលសមត្ថកិច្ចហាមឃាត់នេះទាក់ទងនឹងសន្តិសុខតាមមូលដ្ឋាន។ ស្នងការនគរបាលខេត្តកំពង់ឆ្នាំងលោក ប្រាក់ វុឌ្ឍី និងអ្នកនាំពាក្យរបស់ស្នងការដ្ឋាននគរបាលខេត្តនេះ គឺលោក លី វីរៈ មិនអត្ថាធិប្បាយអ្វីទេ ដោយចុចផ្ដាច់ទូរស័ព្ទនៅពេលសួរពីរឿងនេះ។
ប្រធានផ្នែកបច្ចេកទេសស៊ើបអង្កេតនៃអង្គការលីកាដូ (LICADHO) លោក អំ សំអាត យល់ថា ការហាមឃាត់ ឬហៅសកម្មជនបក្សប្រឆាំងទៅសួរនាំដោយអាជ្ញាធរនោះ គឺជាការគំរាមកំហែង និងបំបិទសិទ្ធិសេរីភាព។ លោកថា ការប្រមូលស្នាមមេដៃ គឺជាសិទ្ធិសេរីភាពរបស់ពលរដ្ឋ លើកលែងតែការប្រមូលនោះ គឺយកទៅធ្វើរឿងអ្វីផ្សេងដែលខុសច្បាប់ ដូច្នេះពលរដ្ឋយល់ព្រមចូលរួមផ្ដល់ស្នាមមេដៃ ឬមិនផ្ដល់ អាស្រ័យលើខ្លឹមសារនៃលិខិត ឬញត្តិភ្ជាប់ស្នាមមេដៃប្រជាពលរដ្ឋទាំងនោះ៖ «លើកលែងតែយើងចាំបង្ខំ បើសិនគេមើលទៅលើអត្ថន័យ ឬយល់ដឹងពីខ្លឹមសារហ្នឹងហើយគេស្ម័គ្រចិត្តផ្ដិត ពីព្រោះអានេះជាការស្នើសុំមិនមែនយកទៅប្រព្រឹត្តនូវបទល្មើសអ្វីមួយទេ។ ខ្ញុំឃើញមានគណបក្សនយោបាយផ្សេងក៏គេធ្វើដូចគ្នាអ៊ីចឹងដែរ មានការផ្ដិតមេដៃគាំទ្រ មានស្អីៗ ដូចៗគ្នាអ៊ីចឹង»។
នៅក្នុងកិច្ចប្រជុំបន្ទាន់មួយរបស់គណៈកម្មាធិការអចិន្ត្រៃយ៍បក្សសង្គ្រោះជាតិ នៅថ្ងៃទី២៧ ខែឧសភា ដឹកនាំដោយលោក សម រង្ស៊ី និងលោក កឹម សុខា បានសម្រេចបន្តធ្វើ និងគាំទ្រលើសកម្មភាពការងារចំនួនបួនចំណុច។ ក្នុងនោះគណបក្សប្រឆាំងក៏បានសម្រេចឲ្យថ្នាក់ដឹកនាំរបស់គណបក្សមូលដ្ឋានគ្រប់ខេត្ត-រាជធានី ដង្ហែញត្តិទៅរាជធានីភ្នំពេញ ដើម្បីថ្វាយព្រះមហាក្សត្រ៕
